Charles Heidsieck er talið í hópi eftirsóttustu kampavína í heimi. Húsið var stofnað árið 1851 af hinum óviðjafnanlega Charles Camille Heidsieck sem hlaut viðurnefnið „Champagne Charlie“ eftir að hafa brotið kampavíni leið inn á Bandaríkjamarkað á sjötta og sjöunda áratug 19. aldar.
Charles Heidsieck framleiðir um eina milljón flaskna á ári og er það allt selt undir ströngum kvóta á hverjum markaði enda eftirspurnin margföld á við framboðið.
Allar flöskur sem húsið sendir frá sér eru geymdar í að lágmarki þrjú ár, og flestar miklu lengur, í mögnuðum kalksteinshellum sem liggja undir höfuðborg Champagne-héraðs, Reims. Þessir hellar voru gerðir af Rómverjum fyrir um 1700 árum og eru í raun námur frá því þegar þeir sóttu kalkstein sem byggingarefni til borgarinnar. Þessir hellar eru á heimsminjaskrá UNESCO.
